 | مركز عرب داونلود لتحميل الصور و الملفات برعاية شبكة و منتديات الحب الناعم  |
 | |
| |
| |
|
|
أنت غير مسجل في منتدى الحب الناعم. للتسجيل الرجاء اضغط هنـا
| |||||||
 |
| | LinkBack | أدوات الموضوع | انواع عرض الموضوع |
06-05-2009, 10:18 PM
| ||||
| ||||
أحلام مسلوبه
واقع تعيش فيه قلوب حزينه,وآااهات تخرج كل ثانيه,جروح تنزف, وقهر وحب ضائع,ولهفه وشوق وحنين يزيد من التعب, والركض الدائم وراء المجهووووول.. هذا هو منصور وهذه حياته وهكذا يعيش هو وعائلته.... .يعيش منصور وعائلته الفقيره ,لامال ولا أقارب والمشاكل تحاصرهم من جميع النواحي.. منصور:الابن الاكبر الذي يتحمل المسئوليه منذ صغره ولم يعرف من الطفوله إلا إسمها, وكان جميل الشكل لكن من شدة الهموم والتعب لم تعد تبان ملامحه .. أبومنصور:أب مستهتر قااااسي لايهمه من الدنياء إلا شرب الخمر والفلوس وحتى من كثر معاصيه أصبح وجهه أسود والكل ينفر من النظر له. أم منصور:مسكينه دائما تتعرض للضرب من زوجها يتيمه وزوجها يستغل ضعفها وكانت رائعة الجمال وصغيرة السن لكن من رأها حسب عمرها تجاوز الخمسين. أخوان وأخوات منصور: حمد,صالح, نوره, مها,فاتن,أشواق,وأخيرا يوسف, حمد:يدرس ثاني ثنوي ودائما يفتعل المشاكل. صالح:يدرس ثالث متوسط طيب وحبوب ويحاول دايم يساعد إخيه منصور. نوره:البنت الكبيره جالسه بالبيت بعد ماكملت الثنوي وتشتغل مع أمها بالخياطه. مها:تدرس اول ثنوي وهي ونوره دايم مع بعض واسرارهم عند بعض. فاتن وأشواق :يدرسون ابتدائي ولايدرون عن شي بالبيت. يوسف:عمره سنتين وهو أخر العنقود وهو الاصغر والاجمل والاغلى من الجميع. كانوا يعيشون بيت في صغير جدا وكانت المشاكل ماتوقف وكان منصور يحاول قد مايقدر يحل الامور.. ........................................ صالح: أقولك فك ايدك ياحيوان, فك ايدك لاوالله أدعسك حمد:ماراح أفك أول شي طلع إللي أنت سارق مني صالح: يابن الحلال ماهي معي والله ماهي معي حمد:من اللي بيشلها غيرك دخل منصور: ايش تبى ياحمد تبى ذي وهو ماسك الشمه بيده حمد:وهو موطي راسه ايه هاتها اش دخلك تشلها منصور: نعناسيك أنت ماتحس ,أنت ماتستحي, أنت ماتشوف حالتنا وتشوف ايش حن فيه,ناقصين اليوم شمه وبكره الله يستر , ترى تعبت حرام عليكم تعبت , طول اليوم اكد بذي السياره المقربعه حتى المكيف مافيها وأخر شي ألقى المصروف اللي أعطيكم اياه يروح في ذا الخنيز. حمد:يامنصور نفداك لاتزعل والله ماهي بفلوسي واحد من العيال اشتراها لي منصور:شراها لك اليوم وبكره ايش يشتري لك , وأنت كل من اشترى لك حد شي بلعته حمد: خلاص أوعدك بقطها بس انت لاتزعل واتضيق خاطرك طلع منصور وهو ضايق من إخوانه إلا يسمع صياح وخصمه ,لين إبيه يخبط امه ويقول لها: طلعي الفلوس لاوالله أخلص عليش ام منصور :الله يحرق كبدك وأنت خليت عندي فلوس ماعندي شي كل اللي عندي صرفته على البيت والباقي خذيته أنت أمس فكني الله ياخذك أبو منصور: الله ياخذني هاه وجاك خبط فيها دخل منصور وهو يجري عشان يفرع في أمه مسكه إبيه ودفه على طول ايديه, وقال له:رح يامره رح لاعادك بتنفع والاطلع لنا فلوس منصور: خلاص يابه نفداك ابشر بس فك امي والله لا أجيب اللي تبى بس فكها ابو منصور : طيب والله لو ماتجي الفلوس لاأقلب البيت على راسكم منصور راح لأمه وضمها وهي تبكي وتقول من وين بجيب له فلوس منصور: ماعليش الله بيزينها من عنده وأنا داس لي كم ريال بسكته بها أم منصور: ياولدي لاتضريه والله ماعاد يفكك اعرفه منصور: ماعليه خليه انا بتصرف طلع منصور من البيت والدنيا صاكه في وجهه والضيقه ذابحته , راح يجلس في مكان متعود دايم يجلس فيه,وهو بيت مهجور عندهم في الحي ومنصور يحب يجلس على السطح حق ذا البيت,لأنه يشوف كل بيوت الحي وانوار الشارع فكان المنظر يعجبه, ومن بين هو جالس إلا فهد واقف فوق راسه (فهد صديق منصور الروح بالروح ودايم مع بعض) فهد:والله إني داري ماني بلاقيك إلا هنا منصور : هلا فهد فهد : وش فيك عسى ماشر يالغالي وش صاير معك اليوم منصور: مافيه شي جديد الخبر نفس الخبر فهد:إبيك يعني , الله يعينكم والله والله يامنصور ولاتزعل من اللي بقوله لوإنه إبي إن أبلغ عليه وهو سكران منصور: والله يافهد بغيت أسويها أكثر من مره لكن قلبي ماطاوعني مهما كان عاده إبي بس الله يهديه إنشاء الله فهد : انشاء الله منصور: يالله انا بروح وراي مكده من الصبح إبي يباله فلوس وأنت رح أرقد ماوراك كليه؟ فهد:إلا وراي بس مالي نفس ودي إنك معي والله مالها طعم الدراسه بدونك منصور : رح ارقد واذكر الله واحمد ربك عاد الدراسه في ايدك فهد: أجل يالله بمشي معك لبيتكم هاثم بروح لبيتنا منصور : يالله في البيت............ نوره: يامها تعبت تعبت من البيت وش اسوي مها: يابنت اذكري الله كلنا معش وكلنا عايشين نفس عيشتش نوره: يامها عادش تطلعين وتروحين للمدرسه وأنا مابلا ماقابله ذي الطوف أحس شوي وبنفجر مها: يانوره وطي صوتش أمي لاتسمعش والله اللي فيها مكفيها,لاتحرقين كبدها بضيقتش, وأنتي عارفه إنها لاشافت حد متضايق ماعاد ترقد الليل نوره:وهي تبكي والله والله أن أكثر مايضايقني امي وش هي متحمله ومنصور اللي خلى الدراسه عشان يصرف علينا مها: أي والله كل ماتذكرت منصور جعلني قبله أحس ببكي يوم ضاع مستقبله عشانا, وبعدين تعالي وهي تغمز وش أخبار الحبايب نوره: أي حبايب الله يرحم والديش مها: أفاااااااااا ليه وش صار؟؟؟؟؟ نوره: مدري بس من كلام نجلا أخته أحس ماعاده زي أول, ونجلا ماعادها تجيب طاريه أصلا وهو ألحين سافر يدرس بأمريكيا يعني بالله عليش عاد عندش أمل يفكر فيني وألا أطري على باله وبعدين لو لو فرضنا كان على الاقل أرسل نجلا لي اللي ماعاد حتى كلمت تشوف أخباري مها: ماعليش منه هو الخسران نوره: وهي تضحك ضحكه مستهئزئه والله مره خسران صراحه ,(ضحكوا كلهم)ونوره تقول صدق شر البليه مايضحك مها : أقول خلينا نرقد وراي مدرسه بكره نوره:أي والله وانا وراي الف شغله ............ أم منصور: يالله ياعيال قومو للمدرسه تاخرتوا يالله نفداكم يالله ياحمد يالله ياصالح يالله يامنصور ماوراك شغل ياولدي,كلهم قامو إلا حمد:يامه بغيب ماعندي شي اليوم أم منصور: أقول قم ياولدي لاتحرق كبدي كيف ماعندك شي قولك أنحن خبلان يالله حمد: نفداش يامه خليني أغيب والله ماعندي شي منصور وهو يشوته برجيله قم لاوالله أصب الماء فوق راسك حمد: طيب الله يخارجنا منكم كلن راح لدوامه وأبو منصور توه شرف للبيت وطبعا شارب ومكيف حده, أبو منصور: وين منصور هو جاب لي الفلوس ام منصور: عاده يوم سرح مسكين ومدري يطلع له شي والا لا ابو منصور:انا بروح أرقد لاجا قوموني أشوف كم جاب أم منصور وهي تمسكه بيده توديه لغرفة النوم, وتقول بخاطرها رح أرقد جعلك ماعاد تقوم, الله يرحني ويريح عيالك منك. ........... جاء الظهر وكلن وصل ماعاد الامنصور ينتظرونه عشان يتغدون, حمد: يالله قد حن بنموت من الجوع كافي مامعنا فسحه عادكم تجوعونا على الغدا نوره: ياخي أنتظر منصور تراه أخيك ماهو واحد من الشارع وبعدين ماحد جعلك تروح من دون فسحه قومك العصيبه عشان ماتسرح حمد: أقولش روحي حضري الغدا لاوالله أدعس بطنش نوره: والله ما أحضره لين يجي منصور وقاموا خصمه الثنين دخل وهومنصوريقول: خلاص وجع أنت وياها يالله يانوره كبيش منه وحضري الغداء نفدى أختي نوره : من عيوني ياأحلى أخ حمد:وهو يقلدها أحلى أخ والله ماهولايق حلو في الوجه منصور:وبعدين ياحمد ..... حمد:طيب خلاص سكتنا منصور:وش حالش يامه نفداش وش قومش مالش حس أم منصور: بخير بشوفتك يالغالي بشر كيف يومك؟.؟ منصور: خليها على ربش والله ماش اليوم ماوصلت ناس واجد و واحد والله ماعاد خليته يدفع حلفت عليه حالته ترحم أم منصور: والله انت اللي حالتك ترحم كان خذيت ياولدي حسابك وش له والحلايف اللي مالها داعي,وبعدين وش بتسوي مع أبيك اللي ينتظر الفلوس منصور: الله يحلها من عنده خلينا نتغدى ذلحين نوره وهي تحط صحن الغداء حمد: وش ذا وين الدجاج وين اللحم حاطين لنا رز بس وش حن عندكم اندنوسين, أم منصور: ياولدي احمد ربك على النعمه غيرك ماحصلها حمد: لاوالله ماأكل وش ذا القرف كل يوم كذا , وبعدين أنت ياسيد منصور مسوي متمنن علينا وأنا أكد وأكد, وين ماشفنا شي لافسحه زي الناس ولازاد ينأكل على ايش تمنن, منصور نزل لقمته اللي كانت الاؤلى وحطها بالصحن وقام وخاطره مكسور من كلام اخيه نوره: الله ياخذك ياعديم الاحساس أيش أنت من عضاته,ياخي حرام عليك حمد: أقول فكينا خلينا نتغدى نوره: ألحين بتاكل ارتحت يوم زعلته كل جعلك ماتمضيه وقامت نوره وبعدها أمها ماعاد جالهم نفس بعد ماقام منصور وكلام حمد .......... منصور وهو جالس في غرفته يفكر وش يسوي مع ابيه , إلاواللي طامر عليه وكان يوسف أخيه الصغير كان ذا الصبي فرحة البيت الكل يحبه, جلس يوسف يحب منصور في كل مكان وجهه وايديه ومنصور يلاعبه ويضحكه وقام يضمه بقوه ورقد يوسف في حضنه منصور ورقد معه منصور, ماقام منصور إلا على خبط وصياح ابيه وهو يقول وين الفلوس, قام منصور شل يوسف وعطاه اخته نوره اللي كانت وتحاول تمسك ابيها, وقال:يابه نفداك والله مامعي الاذي العشرين أبو منصور: قد ذا طولك وكبرك ومكدتك في اليوم عشرين , يافاشل ياصايع وقام يخبط فيه وامه واخوانه يفرعون فيه إلين غصبا فكه وطلع, ............... والكل مجتمع على منصور وهم يبكون قام وهو معصب وقال: خير وش فيكم أول مره أندبغ يعني, يالله كل واحد يروح لمذاكرته وأنا بروح أشوف لي شغل وطلع من الغرفه وهو حاس بوجع فضيع بعد خبط ابيه بس مسوي نفسه قوي ومافيه شي, لحقته أمه وهو طالعه وضمته وبكت وهي تقول : ماعليه ياولدي لاتضيق خاطرك منصور: ماعليش يامه نفداش أنتي اللي لاتضيقين خاطرش وارضي علي والله إن رضاش عندي بالدنيا كلها أم منصور: الله يرضى عليك ويفتحها بوجهك يامنصور ياولدي هاخذ ذي العشره وأنا أمك عبي فيها بنزين وإلاكل بها شي. منصور: وهو يحب يد أمه طيب أبشري يالله مع السلامه طلع منصور وهو رايح يمين يسار في ذي الشوارع مالقى حد يوصله , وقام يحاول يغير الشوارع لين لقى له كم واحد ورجع البيت أخر الليل لقاهم قد رقدوا كلهم تطمن عليهم ورجع يقعد في المكان اللي يحبه فوق ذاك البيت وهو جالس ودموعه تنزل من الضيقه والقهر اللي فيه, سمع حركه وصوت مشي, شبح يمين يسار مالقى حد, قام يدعي يافهد هذا أنت ترى والله ماني ناقص يالله اطلع بلاسماجه, رجع شبح مالقى حد والصوت يزيد ويقرب, شوي الايشوف ظل طالع عليه من باب السطح ظل كبير ويتحرك صوبه, منصور :جلس يسمي ويقرا المعوذات ويقرا اية الكرسي ويقول من اللي هناك, وكل ماقرب الظل صوب منصور كل مازاد خوفه, قال منصور:أقول من اللي هناك جاه صوت من الظل لكن ايش صوت صووووووت................؟؟؟؟؟؟ إنتهى الجزء الاول انشاء الله يعجبكم ,وياليت تشاركوني بتوقعاتكم , وش تتوقعون مصدر الصوت والظل ؟؟؟وايش ردة فعل منصور؟؟ .................................................. .............. الجزء الثااااااااااااااااااااااني جاء صوت من الظل لكن ايش صوت صوووووووووووووت عذب رقيق كان صوت بنت.. تقول : وش فيك يامنصور منصور:بسم الله اعوذ بالله من اللي يتحاكى البنت كانت تبان ملامحها شوي شوي وكل مابان له من ملامحها شي زاد خوفه كان بنت غايه باالجمال ,والرقه ,والخجل,كانت ملامحها تدل على انها في عمر العشرين,وقامت تمشي صوب منصور بسحى, قربت منه ومنصور مصدوم حتى ماعاد قام يقرا اذاكر وايات, قربت منه أكثر وأكثر إلين صار وجهها مقابل وجهه, قالت له:ليه أنت حزين كذا منصور: ........................ البنت:وش فيك لذي الدرجه أنا أخوف منصور:أ............أأ............أأأ.......... البنت وهي تضحك ضحكه بريئه وجذابه:وش فيك يالله أبغاك تفضفض لي منصور:أ....أ........من أنتي؟؟؟ البنت:ماهوبلازم تعرف من أنا المهم أنت وقربت منه كثير وحس منصور بانفاسها وكانت ريحتها حلوه كثير كلها مسك وعطور قربت منه وقالت انت انسان نادريامنصورانت داري اني أكون معك وين ماتروح يا منصور أنا أنا أنا سمعوا حركه وصوت مشي, قالت:خلاص لازم أروح بشوفك بعدين منصور : لحظه لحظه واختفت البنت منصور:افصصصصصصصصصل فهد:منصور وش انت تسوي مع من تسولف ذكر الله منصور :الله يلعنك حزتك تجي ذلحين فهد: أفاااااااااا خلاص خذ راحتك بروح منصور:تعال ذلحين حلو في الوجه لكن والله لاتلومني من اللي شفته فهد: وش شفت منصور:بنت يافهد لكن وش بنت عن ألف بنت فهد:أحلى والله منت هين يامنصور غير من هي بنته؟؟ منصور: ...مدري فهد:وين هي ساكنه؟؟ منصور: ...مدري فهد: وين شفتها طيب؟؟ منصور: هنا قبل شوي فهد: الحمد لله والشكر أنت صاحي ياولد من البنت اللي بتشوفها في ذا البيت المهجور ولاااعاده أخر الليل منصور: مدري مدري يافهد لكنها حلوه حلوه ملكة جمال عمري ماشفت أجمل منها,عمري ماشفت أرق منها ,عمري ماأرتحت لحد مثل مارتحت معها, فهد والله والله ماتصدق كيف كنت متضايق وزعلان حتى دموعي كانت تنزل بس بعد ماقربت مني وحسيت بانفاسها وريحتها الللي خذت عقلي حسيت خذت كل شي ضيقتي وزعلي وخذت القهر اللي فيني أحس أحس مدري كيف أعبر لك..... فهد وهو يحط ايده على راس منصور: والله انك مسخن ياصبي هيا سرينا للطواري منصور :أي طواري خلني يافهد خلني فهد:طيب ها هيا اسري للبيت ماوراك شغل وبعدين بيطلع الصبح عادك توصفها, ........كلن راح لبيته منصور على فراشه ويفكر وعقله ماهو معه وكل تفكيره بذيك البنت, شوي يتذكر ملامحها ,شوي ضحكتها,شوي يغمض عيونه ويشم ريحتها,وهويقول لنفسه أنا بحلم والابعلم ياربي ,مر الوقت وهو يفكر فيها طول الليل و ماحس منصور الاامه تقومهم للصلاه والدوام,قام منصور وهو تعبان عشانه مارقد أم منصور:وشفيك ياولدي عسى ماشر كنك تعبان منصور: والله يامه عمري ماكنت بخير وفرحان مثل اليوم أم منصور:ياجعله دوم وش اللي مفرحك كذا منصور: وهو يبتسم لامه ويقول يالله يالله مع السلامه نوره: والله الصبي ماهو بصاحي لايكون خرب مع الشيبه أم منصور:وهي تخبط نوره وجع جعلش الوجع كلن بيخرب الامنصور جعني قبله والله لاشك باخوانش كلهم الامنصور قومي جعلش النقمه خلينا ننظف البيت ونرجع نكمل الخياطه نوره:ياااربي والله تعبت من الخياطه قد عيوني بيجيها حول وظهري قد هو منعوج أم منصور:يابنتي وش نسوي كلن يدور على رزقه وعاد أم خالد جارتنا تبى الثوب بكره ولابعد سوينا فيه شي يالله نفدى بنتي خلصي شغلش وساعديني نوره:طيب امري لله أبو منصور وهويصيح وين الفطووووووووور أم منصور:قام بقعا المحتثيه غريبه قايم ذا الوقت روحي دفي له الفطور وعطيه اياه مالي خلق اشبح في خشته الشينه نوره:طيب يامه نوره وهي تحط الفطور عند ابيها مسكها من ايدها وجلسها جنبه وقام يمسح على شعرها ويحط ايده على كتفها وشبح فيها من فوق لتحت.. وقال: والله وكبرتي يانوير نوره وهي معصبه :يالله يابه عادك تبى شي أمي تباني اساعدها أبيها وهويعطيها خبطه على ظهرها ويقول اجلسي لاكسر وجهش عندي لش اخبار حلوه عندي لش خطيب بس ايش خطيب فلته, وانتي قدش معنسه وهو رجال ماشاء الله عليه نوره : مابغى اتزوج ابغى اقعد اساعد امي في الخياطه والبيت ابو منصور: غير اسالي من هو نوره :....................... ابو منصور: يعني مستحيه ماتسالين من هو طيب طيب هو خوي فالح رجال مريش ,وقده مجهز لش بيت لحالش نوره:وهي تصيح مفجوعه ليه ماهو بكبرك ومتزوج ثلاث يابه انت من جدك ,تبى تزوجني ذا المخرف التعبان ,لا لا يابه حرام حرام عليك والله والله اني ماخذه ابو منصور على طول صفقها على وجهها وقال : والله لاتاخذينه غصب عنك يامعنسه ام منصور: خير خير ايش قومكم ,وش قومك على البنت يابن الحلال ماعندك رحمه كل يوم لازم تخبط لك حدى ذولا العيال ابو منصور:خلي البنت تجهز بكره ترى خطبتها ام منصور :خطبتها ؟؟ايش خطبتها؟؟؟ومن اللي خطبها ابو منصور :خوي فالح (يقولها بكل فخر) ام منصور: فالح الشيبه اللي متزوج ثلاث حرام عليك ياظالم تبى تظلم حظ بنتك بذي الزواجه وبعدين بدري عادها صغيره عادها مالها من يوم تخرجت ابو منصور وهو ماسك نوره وامها وضربهم في بعض وقال: والله والله لو اسمع كلمه اذا جا العرب بكره ان يكون اخر يوم في حياتكم ياثنتين ,وطلع من عندهم نوره وامها طايحين على بعض ويبكون.......... الظهر...... وكل من جا من الدوام مالقى حد بالصاله لا نوره ولاامهم كاعادتهم اليوميه,وحتى الغدا مابه غداء الكل جالس بالصاله ومستغرب وش السالفه.. جا منصور وعاده مبسوط وفرحان من اللي صار له بالليل قال: سلااااااااااااااام الكل: وعليك السلام منصور: وش فيكم وين امي ونوره والغداء حمد : خزاهم كلن ماد بوزه مايبونا نتحاكى ونقول وين الغدا منصور : خلاص خذ ذي العشرين وجب غدا لك وللعيال ولاتبطي وانتبه للسياره,تراهامقربعه مايحتاج تتفنن فيها حمد : يااااااااااالبيه يالله ياصالح رح معي منصور:تعال تعال انت وياه غير ماصدقو رح انت لحالك ولك عشر دقايق والله لين تبطي غير قد هو يبى يسوي حفله بالسياره حمد : وهو مبوز طيب منصور وهورايح لامه :سلام يامه نفداش وحبها على راسها ام منصور:وهي تكتم شهقاتها ودموعها هلا بنظر عيني هلا بنور البيت وش حالك وكيف يومك منصور:كل شي بخير بشوفتش يالغاليه,أنت اللي طمنيني عليش وش فيكم اليوم مااحد على بعضه ام منصور: ماعاد تحملت وقامت تبكي بقوه منصور: أفااااااااااااااااا والله يالعلم عسى ماشر يالغاليه ماعاش والله من يبكيش ام منصور:ابيك يامنصور ابيك منصور: وش فيه ؟؟وش في ابي؟؟وش قده مسوي؟؟؟ ام منصور: يبى يزوج نوره منصور: طيب وين المشكله الساعه المباركه ونوره تستاهل كل خير ام منصور: أي خير وهو يبى يزوحها فالح خويه فالح يامنصور فالح وهي تبكي منصور: ايش ؟؟؟؟ايش تقولين؟؟؟ ام منصور: قال لنا الصبح وقال بكره الخطبه وبيجون الناس يخطبون منصور: لا لا أبى ذا انتهى بروح أدور له وأكلمه أم منصور: تعال لاتروح منصور:بس بكلمه بفهم الموضوع ............................ في غرفة البنات.. نوره: يامها روحي جيبي التلفون بسرعه من الصاله مها : ليه من تبين تكلمين نوره: أبغى أكلم نجلا مها: ليه وش تبين تقولين لها نوره:مدري مدري يامها وهي تبكي مها: يابنت الحلال صلي على النبي وماهو بصاير الاكل خير انشاء الله نوره: ومن وين بيجي الخير وابيش في ذي الدنيا ,روحي بسرعه جيبي التلفون مها: طيب بس بشرط ماتسالين عن سلمان ولاتجيبين طاريه نوره:طيب هايالله نوره:سلام يانجلا وش اخبارش نجلا:أهليـــــــــــــــــــــــــن بالنوري والله وينش يالغاليه وين ذي القطاعه نوره: في ذي الدنيا وانتي ماعاد دقيتي علي نجلا: لا والله اني ادق لكن متردون والايرد علي ابيش فقفل بوجهه سامحيني بس اذل ماسمعت صوته نوره : ماعلينا انتي اخبارش وعلومش نجلا: انا بخير والحمد لله والدراسه تمام وابشرك طلعت الاولى ذا الترم على الدفعه الله يستر عليش لو انش كملتي كان مانافسني الاانتي نوره: حال الدنيا وبعدين لو درست من اللي بيساعد امي تدرين الخياطه والعنا اللي يجي منها نجلا: انتي ايش حالش واخر اخبارش يالله قولي لي بالتفصيل نوره: زفت زفت زفت نجلا : أفااااا ليه يالغاليه يالله ابغاش تفضفضين لي ماهو انا صديقة عمرش يالله نوره:أبد مابلا خطبتي بكره نجلا :بنبره..ايش ايش تقولين ؟؟؟ نوره: اللي سمعتي نجلا: على من؟؟؟ نوره: على واحد من اخويا ابي نجلا: وسلمان ؟؟وسلمان يانوره نوره: ليه أنا أصلا باقي في باله نجلا:انتي خبلتي على باله ونص نوره: ليه ماعادش تجيبين طاريه ولاسلام منه ولاكلام نجلا: يالخبل عز الله انش خبل ,اول شي قلت لش اني ماقدرت اكلمش ثاني شي هو ماقده يكلم مايطول المكالمات غاليه والارسال ضعيف ويالله يكلم ابي وامي ويقول لهم سلمولي على نجلا سلااام خاص فاادري انه لش لانه قال لي السلام الخاص لش انتي نوره : وهي تبكي بحرقه والله انش زدتيني على مافيني نجلا: طيب حاولو منا ولامناك وحاولو تدخلون حد يمنع ذا الزواج واللله لايخبل سلمان والله نوره : من ندخل من كثر أقاربنا وبعدين راح منصور يكلمه ومدري ايش بيصير نجلا: حلو يالله انشاء الله خير والله قلبي معش ومع سلمان نوره:طيب انا بقفل وبكلمش بعدين اعلمش وش بيصير نجلا:طيب ترى انتظر بقعد على اعصااابي طيب نوره : طيب يالله مع السلامه نجلا: في حفظ الله يالغاليه .............. في الحوش.. ابو منصور قاعد ويدندن ويغني مبسوووووط منصور: سلام يابه وش حالك ابو منصور: الله لايسلم فيك ولاعظم نعناسيك عادني بستفيد منك ياذا الولد العاق منصور:وش تباني اسوي اللي اكده اصرف به على اخواني والبيت وحتى انا والله مايبقى لي شي ابو منصور:يعنني مسوي رجال البيت حلو في الوجه منصور: يابه وش اللي سمعته ابو منصور: وش اللي سمعته؟؟لحظه لحظه بروح ارقد واحلم وش سمع منصور واجيك اعلمك وقام يضحك منصور:يابه صدق..وش فالح وش نوره..وش الخطبه ذي اللي مالها داعي ابو منصور:مالك دخل ذي سوالف كبار ياورع امك رح رح رح لامك اقول منصور:يابه نفداك طالبك الارافض ذي الخطبه ابو منصور: وهو يضحك كيف ارفضها وانا اللي قلت عندي بنت منصور:يابه حرام عليك انت تبيع بنتك لوحش ماهوانسان ذا حرام عليك الله لايسامحك لو تزوجها له الله لايسامحك قام ابو منصور لين قد جنبه حديده طايحه واخبط بها على ايد منصور منصور من الوجع طاح من طوله ابو منصور:ذي المره بعديها لك لكن زد تدخل والله مااحطها إلابين عيونك وطلع ام منصور : وهي تجري كان كبيهنته ياولدي مابلا اوجعك, انك تنفخ في قربه مقطوعه الله ياخذه منصور:ماعليه وين نوره ذلحين ام منصور: في الغرف مبلاطايحه تبكي قطعت كبدي منصور وهو داخل الغرفه طمرت نوره على ارجيله وهي تبكي وهي تقول منصور ياعزوتي نفداك نفدا ارجيلك الامسوي لي شي منصور:وهو يرفعها ويضمها ويحاول يحبس دموعه نوره يالغاليه قال الله تعالى(وعسى ان تكرهو شيا وهو خيرا لكم) يمكن انه خيره لش نوره:وهي توخره وين خيره وتبكي لا لا لا لا يامنصور تكفى الافالح وانت عارف انه نسخه عن ابي وتعرف انه يشرب كيف خيره وانا بعيش نفس عيشة امي ولابعد معي طباين منصور: خلاص لاتحرقين كبدي وكبد امي وبعدين قدش خابره والله لو يشوفش ابي كذا بكره والله لايذبحش ويذبحنا معش ............. في الليل.. الكل زعلان ومهموم عشان نوره ,دخل عليهم ابيهم وهو يقول وش قومكم كن حد ميت لكم,اسمعوا الخطبه والملكه بكره الرجال مستعجل,وشبح في زوجته وقال خذي ذي الفلوس وروحي الصبح اشتري لها ثوب قدام العرب وقطها في وجهها وراح الكل قام يبكي واللي يصيح واللي يخاصم,قام منصور يحاول يهدي فيهم وخلاهم يرقدون,الكل منسدح وترقب بكره وش يبصير ويتمنى الشمس ماتطلع. خرج منصور وكعادته يخرج من البيت متكدر وزعلان,تذكر البنت وراح بسرعه للبيت المهجور وجلس ينتظرها , مرت ساعه مرت ساعتين وهي ماجات, دمعت عيون منصور وهو يصيح بصوت عالي وينــــــــــــــــــش وينـــــــــــــــش وجلس على ركبته من القهر شوي الاحس بالصوت والحركه, شوي الاريحتها غطت المكان ولين يدها على كتفه وهي ترفعه عشان يوقف,كان ذي المره جمالها اكبر ,وريحتها احلى , البنت: كنك كنك كنت تنظرني منصور: وينش تاخرتي تاخرتي كثير كثير ,ورحتي ولاقلتي لي متى بترجعين,,ولاقلتي من انتي؟؟ولاايش اسمش؟؟ولا ولا ولا...... البنت:وهي تضحك ضحكه عاليه كل ذي الاسئله ماهي لازم تعرف الجواب عليها المهم انت ماأبغى اشوفك زعلان ومتكدر منصور:وش اسوي غصب علي كل الظروف ضدي وكلها صعبه, والحين اختي يبون يزوجونها غصب بكره وانا مافي ايدي شي ولااقدر اقول لا احس بموت من القهر من العجز اللي احس به البنت: قربت منه ومسكت ايده الثنتين قالت منصور من قال مافي ايدك شي شوف انت خلك واثق من نفسك ووقف في وجه اللي اسمه فالح منصور:كيف عرفتي اسمه؟؟؟؟ البنت: ماعلينا كيف عرففت المهم اذا شافك واقف بكل ثقه بوجهه هو بيتراجع واوعدك بذا الشي منصور: طيب كيف ؟؟وويش اسوي؟؟ومتى وقد الخطبه بكره البنت:انت بتعرف ايش تسوي وتعرف الوقت المناسب البنت وهي تمسح يدها على وجهه وخلته يغمض حبته على جبهته وقالت انتبه على نفسك وبشوفك قريب,,منصور عايش عالم ثاني عايش مع ريحتها وهو مغمض ,شوي فتح عيونه ماعاد لقاها.. رجع منصور البيت وهو يفكر بكلامها انه يقدر يسوي شي جا الصبح والكل صاحي وكأنه عزا اليوم,طلع منصور وهو مسرع وماكلم احد وركب السياره وهو مسرع ولاوقف إلا قدام بيت فالح,دق الباب باقوى ماعنده طلع حدى عياله قال نعم خير وش ذا الدق ياخي منصور :رح ادعي لي ابيك الولد:ابي راقد ولاكان قام لك ذا الوقت منصور:صحه لي لا والله اخلي ذا اليوم اسود عليك وعليه الولد:طيب اعصابك طلع فالح وبشكله البشع وقشعته الطايره وسواده اللي يطير العقل, وهو يحك راسه ويثاوب هلا هلا والله بالنسيب قرب منه منصور وحط عيونه بعيون فالح , وقال: والله والله لو اشوفك اليوم في بيتنا والله لاأحرقك, وأحرق بيوتك ,وأحرق أهلك,وأحرق سياراتك ,ولاتقول ماراح أسويها , تراني مجنون ولاعلى المجنون من حرج,ولاتفكر ان ابي بيردعني أقل شي بكلم الشرطه يجون يشلونه لانه مدمن فالح: وهو مصدوم هد أعصابك يابن الحلال وبعدين ابيك اللي عرض علي منصور: ابي اللي عرض ابي اللي باع أنا علمتك وش اسوي لاشفتك اليوم فالح: أسف انا قد عطيت ابيك الفلوس وماراح اتراجع منصور رجع لسيارته وهو مسرع وطلع العجرا وراح لسيارة فالح اليوكين واكسر قزاز السياره الامامي الرجال ماعاد استوعب وهو يقول يابن الحرام ياحيوان يا......... ويا...... منصور: هذا تحذير واذا انت رجال تعال اخطب اليوم عندنا وفلوسك خذها من ابي اذا تباها رجع منصور وراح يكمل شغله وهو يفكرهو اللي سواه كافي انه يمنع ذي الزواجه. ..................... البيت.. الكل على نار وش بيصير ونوره مابلا طايحه منهاره تبكي,واخواتها قاعدين يسكتون فيها, وابيهم كاشخ ومترزز وقده مخبط العيال عشان يلبسون ويجلسون معه في المجلس , والكل ينتظر فالح وهله والماذون , مر الوقت وقد الساعه 7 في الليل وابو منصور يدق على جوال فالح وفالح مايرد عليه والكل مستغرب من ذا التاخير , جات الساعه تسعه وفالح ماجا ولاكلم, وقتها الامنصور توه داخل شاف الكل مستغرب تاخر فالح مشى على طول راح لامه وحبها فوق راسها وقال: تطمني يالغاليه , وراح لنوره ورفع راسها ومسح ادموعها وقال : تطمني ياعيون منصور ماهو بصاير الااللي في خاطرش وقتها عرفت نوره ان منصور مسوي شي عشان كذا فالح ماجا , وقامت تحب ايده وهي تبكي وتقول الله لايحرمني منك الله يخليك لنا ياخوي طلع منصور وهوخارج يسمع صياح ابيه وهو يقرا رساله من فالح على الجوال يقول فيها ماعاده يبى يخطب ويرد له فلوسه, ابتسم ابتسامه رضا عن اللي سواه وراح بسرعه بدون تفكير للبيت المهجور.. وجلس ينتظر البنت, ويتخيل أنها تحبه ويتخيل اسمها وكل شوي يركب اسم على شكلها ويقول لاذا احلى لاذاك احلى, يتخيل انه يجلس معها طول الليل وهو يسمعها تسولف له وهو يتامل عيونها ,ويتامل برائتها, شوي الايسمع حركه فز قلبه شبح لينه فهد.. فهد : سلام وش تسوي شكلك ادمنت المكان ياولد منصور: تلومني والله لو اجلس ليل ونهار هنا مااطفش فهد: يامنصور والله اني خايف عليك منصور: من ويش انت خايف؟؟ فهد : من البنت اللي قلت لي عنها أكيد أنها جنيه متشكله بشكل بنت وإلا انك تتخيل منصور : أول شي ماهي جنيه لأنها لمستني وبعدين كنت اقرا ايات واذكار كان منعتها لو انها جنيه , واتخيل ليه قالو لك خبلت لذي الدرجه فهد: لاحاشاك بس والله اني خايف عليك ,يعني كيف بنت تجي اخر الليل في بيت مهجور ولابعد تعرف كل شي عنك ,اسمك وهلك وكل شي منصور : والله يافهد والله ماتصدق كل ذي التفاصيل مافكرت فيها ولاتهمني وكل اللي يهمني اني اشوفها مره ثانيه وبس فهد: المهم اش صاار على موضوع نوره اختك منصور : لاالحمد لله عدى على خير ولاتم شي فهد : هاه علمك وش سويتوا منصور : سلامتك وعلمه بكل اللي صار فهد :يعني قصدك الجنيه اووووووه اسف البنت الحلوه هي اللي شجعتك منصور: مدري بس حسيت بعد كلامها لي بثقه وقوه ماتتخيل كيف وحتى فالح توقعت يدق على الشرطه وياخذوني قلت ماني بممسي الاعندهم ولكن والله ماتصدق كيف كان خايف مني فهد: أحلى والله يطلع منك يامنصور منصور:وجع لاتقعد تتمسخر علي فهد: طيب يالله بروح قد الساعه 1 ونص ماوراك شغل منصور: الابس بقعد هنا شوي واروح, رح انت الله يستر عليك فهد:أهااااااا اثرك قدك تبى الفكه عشان الحبايب يجون منصور:ياليت يافهد ياااااااااااليت تجي واشوفها فهد: طيب انشاء الله تشوفها يالله مع السلامه منصور جلس يفكر في البنت وينتظر وينتظر مرت ساعتين ولاجات ياس وراح لبيتهم مرت أربعه ايام وهوكل ليله يجي ولايلقاها , زادت ضيقته وعصبيته ومتنرفز طول الوقت وصار يروح كل مافضي للبيت سوا نهار والاليل.. في البيت الظهر............ منصور عاده جاي من شغله, لقا الدنيا قايمه وقاعده ,ايش فيه وش صار أم منصور: منصور ياولدي أخيك حمد مدري وينه منصور:ليه مابعد جاو العيال من المدرسه ام منصور: الاصالح جا ويقول ان حمد ماداوم في المدرسه اصلا منصور: اش ذا الكلام انا موصلهم بنفسي الثنين لباب المدرسه ياصالح انا ماوصلتكم لباب المدرسه صالح :إلا منصور:طيب ايش صار وقول الصدق لاتكذب صالح: بعد ماوصلتنا جاو اخويا حمد وخذوه قالو بياخذون لهم كم لفه ويجون قبل لاتصفر ومر الوقت وصفرت ولاعودوا ام منصور:ياويل حالي ويلاه وين ذا الصبي غدا لايكون صار له شي منصور: يامه نفداش لاتحرقين كبدش انشاء الله مافيه لااالخير بروح ادور له واعلمكم طلع منصور وهو يفكر وين يدوره اخيه,طلع ماخلى مكان من الاماكن اللي يتوقع يلقاه فيها وما لقاه,قال ماعاد لي الاالمستشفيات والمراكز الشرطه بس خنى اروح لبيت خويه محمد واساله عنه يمكن يعرف شي, دق الباب على هل محمد منصور :سلام عليكم ابو محمد: وعليكم السلام ياهلا منصور:ايش الحال طال عمرك ابو محمد: الحمد لله اقلط حيااك منصور: لاجعلك سالم بس حبيت اسال عن محمد ابغى اساله عن شي ابو محمد:لاعاد تجيب طاريه الله يلعنه في الدنيا ولاخره منصور: ليه ياعم عسى ماشر ابو محمد: انت داري قد له اسبوعين مهرب من المدرسه وعادني يوم دريت وقدني متحلف فيه بس مابعد ضوى منصور: أي والله حتى حمد اخي معه والله ماخليت لهم مادور ابو محمد: خلهم منك جعلهم في حريقه مامنهم الاحرقت الكبد منصور: ماعليه انا عاد زد بدور عليهم ابو محمد : كيفك اما انا بشتري راحتي واقفل بابي وماورى والابواب الاالكلاب منصور من مستشفى لمستشفى , ومن قسم لقسم مالقى حد,شوي الاجهازه يدق منصور: الو الرجال : السلام عليكم منصور: وعليكم السلام الرجال:منصور سالم منصور:نعم وصلت الرجال عندك أخ اسمه حمد سالم منصور: ايوه خير انشاء الله لايكون فيه شي الرجال:لاخير بس.........................؟؟؟؟؟؟؟؟؟؟؟؟؟؟ انتهى الجز الثاني وياليت بعد تشاركوني بتوقعاتكم ومن هو الرجال اللي كلم منصور؟؟؟؟ووين تتوقعون حمد؟؟؟ ........................................ الجز الثالث الرجال:سلام عليكم منصور: وعليكم السلام الرجال: منصور سالم منصور:نعم وصلت الرجال: عندك أخ اسمه حمد منصور: ايوه خير انشاء الله الرجال: خير بس تعال راجعنا القسم وتعرف منصور: طيب دقايق وأنا عندكم راح منصور ودخل عليهم وسلام وكلام وقام يسال وش السالفه الضابط: حمد أخيك صح منصور: ايه نعم الضابط: طيب كيف مهملينه كذا ولاحسيب ولارقيب ومخلينه مع افسد شله منصور:ليه وش هو مسوي الضابط: ايش ماسوى هو وشلته, اخيك ياطويل العمر مشترك في عصابة سرق وقد لنا ثلاثه شهور تجينا شكاوي من الناس, وقمنا سوينا خطه وراقبنا لين وصلنا لهم بس شكل اخيك توه مبتدي لانه اللي فضحهم. منصور: والله ماتوقعت هو دايم في البيت ونادر مايطلع ويغيب ولاقد لاحظنا عليه شي الضابط: المهم هو عندنا لين تكمل التحقيقات ونشوف كم عليه تهمه منصور: طيب ممكن أشوفه الضابط: ايه خل العسكري اللي برى يدخلك عليه حمد وهو يبكي ويضم منصور: منصور سامحني اني داري سودت وجيهكم ,اني داري خيبت ظنك,سامحني والله ماعاد اعيدها والله ماعاد امشي معهم والله ماعاد اطلع من البيت,بس تكفى لاتعلم امي اني هنا قول لها أي شي قول اني مت اني سافرت أي شي لا تقول اني بالسجن, منصور تكلم قول شي خاصمني اصفقني اخبطني لاتسكت . قام منصور وخر حمد عنه وشبح فيه من فوق لتحت وراح ,حمد قام يبكي وهويقول تكفى لاتروح من دون لاتكلمني ,منصور خذني معك تكفى لاتخليني.. طلع منصور من قسم الشرطه والدنيا مقفله في وجهه ويفكر وش يقول لامه واخوانه و والوقت تاخر وامه اكيد انها على نار , راح البيت الكل جرى عليه ام منصور: هاه بشر حمد وينه لقيته؟؟ منصور: ايه لقيته وبخير ماعليش مافيه الاالعافيه لاتخافين بس ام منصور: وينه ليه ماجبته معك طيب منصور: يامه نفداش خلاص قلت لش انه بخير جعله انشاء الله يموت ام منصور: وهي تبكي ان والله داريه انه مسوي شي والامادعيت عليه هاه وش قدهو مسوي وش مصيبته منصور:سكت شوي وقال لهله كل اللي صار أمه على طول انهارت واغمى عليها الكل تجمع عليها وهم يبكون مسكها منصور وقام يصحي فيها ويقرا عليها ويرش شوية مويه لين صحت ,وقام يهدي فيها ويقول لها :ماعليش السالفه بسيطه يعدين الظابط قال انه توه مبتدي ماله في ذي السوالف وانه بيساعدنا ماعليه نفداش انتي خذي ذي الحبوب وارقدي وارتاحي ومن اصبح افلح ام منصور: ياولدي من وين بيجيني النوم وحمد ماهو بالبيت وقامت تبكي منصور: يامه نفدى ارجيلش لاتحرقين كبدي تكفين وقام يحب ايدها وراسها وكل مكان بوجها وراح يحب ارجيلها هابس نفداش ام منصور: رفعت راسه الله يرضى عليك ياولدي خلاص بروح ارقد عشانك منصور: وعد يامه هايالله بروح معش لين ترقدين راح منصور وقعد عند راس امه وقام يغططه وهو يقرا ايات قرانيه بصوت واطي وبترتيل لين شافها رقدت,طلع لقى اخوانه متجمعين بالصاله زعلانين قام يهدي فيهم منصور: يالله يانوره انتي والبنات يالله روحو ارقدو وانشاء الله بيطلع قريب لاتخافون وخذي يوسف رقديه معش امي تعبانه , راحوا البنات لغرفتهم صالح جالس في زاوية الصاله وحاط ايده على وجهه منصور: يالله ياصالح رح ارقد صالح:.................. منصور: اصالح يالله يالله نفدا اخي صالح: بصوت مقطوع طيب بروح بعد شوي منصور: قرب من صالح ورفع ايده لين دموعه تنزل مسكه سحبه له وضمه وهو يقول لاتضيق خاطرك انشاء الله بيطلع صالح بكى يوم ضمه اخيه وهو يقول :انا السبب انا السبب,لو اني اعلمكم بحركاته,والفلوس اللي كانت معه كان قدرتوا تمنعونه لكني سكت وكنت جبان بعد ماهددني ليتني ماسمعت كلامه وعلمتكم ليته خبطني لين يكسرني,بس مايكون بذاك المكان منصور احس بضيقه بتموتني والله لو ينسجن ان اخبل والله مااقدر على فراق حمد منصور: الله الله كل ذا لحمد وحن وش بقى لنا وهو يخبطه على خفيف وبعدين انت قدك كبير ورجال عاقل وانا قلت لكم الضابط قال انه توه مبتدي ويمكن يطلع براءه بس انت ادعي له الله يفرجها وكب الضيقه منك وتوكل على لله ومن توكل على الله ماخاب,هايالله رح ارقد وانا بطلع لي شوي واجي طيب صالح:الله يخليك لنا يامنصور طيب بروح أرقد طلع منصور ويومه بالحوش لين ابيه عاده يوم شرف ومكيف الرجال ومبسوط شبح في ابيه وقال : الله لايسامحك ابو منصور: هاه هاه وش قلهنت ,لاشكلك تبغى تخرب مزاجي اليوم وتبغاني ادبغك ,شكلك تعودت على الدبغ كل يوم منصوروهو معصب وكارهه نفسه : إلى متى ؟؟!!! إلى متى وأنت كذا؟؟؟إلى متى وأنت في عصيانك لربك؟؟ إالى متى وأنت تارك لصلاتك؟؟؟إلى متى وأنت تزيدنا قهر تزيدنا غبن وتزيدنا مشاكل؟؟إلى متى وأنت تشرب ذا السم الهاري؟؟؟ إلى متى وقلبك حجر ؟؟؟ إلى متى وأنت مهمل بيتك وعيالك ,خلاص يكفي يكفي حرام عليك اتق الله في نفسك,وبيتك ,ماهو كافي كل يوم ترقد أمي وهي تبكي,,ماهو كافي اني تركت حلمي ودراستي عشان اصرف على البيت,,ماهو كافي بغيت تودي نوره في داهيه وتزوجها ذاك المسخ,,ماهو كافي إن ولدك صار سراق وقد هو في السجن مع المجرمين والقتالين,, ماهو كافي إن كل الناس صارو ينفرون لقدهم يسمعون اسمنا,,وبعديـــــــــن وبعديــــــــــن؟؟؟؟؟!!!!! طلع منصور وخلى ابيه المصدوم من كلامه , وعلى طول راح للبيت المهجور جلس على حافة السطح وجلس يبكي ويبكي بحرقه ,بألم يبكي على كل السنين القهر,يبكي على امه ,يبكي على ابيه وضياعه ,ويبكي على دراسته اللي ضاعت, يبكي على اخوانه اللي يشوفهم يضيعون الواحد ورى الثاني,يبكي على شوقه لذيك البنت,شوي الا حس بريحه حلوه بالهواء عرف انها البنت ,قام يتشبح يمين ويسار ماشاف حد صار يحس الريحه تقوى وتقوى منه ولاشاف حد ,غمض عيونه وجلس يتخيل شكلها مع الريحه الموجوده ,ويتذكرها يومها تقرب منه وتسولف له,شوي يسمع صوت البنت: منصور يامنصور فتح عيونك منصور كان جالس على حافة السور فتح عيونه لقى البنت قدامه معلقه بالهوى فز لينه على في السطح طايح وجلس يسمي ويقول: صدق يعني انتي جنيه ,قامت تضحك ضحكتها البريئه وتقول: لا لايامنصور ماني جنيه منصور: ليه معلقه بالهوى كيف سويتي؟؟ البنت: تبى تعرف كيف منصور : ايوه البنت: خلاص قرب واطلع مره ثانيه على حافة السور وغمض عيونك وأهم شي تكون واثق فيني منصور : طيب أصلا انا مسلمش روحي, سوي اللي تبين فيني ابتسمت البنت وقالت يالله غمض لفت من وراه وحطت ايدها بيده وشوي منصور يحس بهوى قوي وقالت خلاص يالله افتح عيونك فتح منصور عيونه شاف شي شي شي شي لايوصف شاف.......................؟؟؟ انتهى الجز الثالث واتمنى منك أخر توقعاتك للجزء الاخير.. وش تتوقعون منصور شاف؟؟؟ وش بيصير لحمد؟؟ ................................... الجزء الرابع والاخير.... .................................... فتح منصور عيونه وشاف شي شي لايوصف,نفسه لقى نفسه بين السماء والارض ,كان يطير ويطير وكان يرتفع ويشوف الناس والبيوت تصغر شوي شوي, وكان يسمع ضحك البنت وهي ماسكته وتقول: عيش يامنصور عيش ذي اللحظه ,عيشها واستمتع اضحك بصوت عالي صيح علي صوتك, قول اللي بخاطرك,وقتها منصورقام يطلع اللي بخاطره وصار يضحك ضحك هستيري ويصيح ويتكلم ويقول كل شي تمنى يقوله بدون خوف وقامت تطير به الين وصلت لمكان غريب عجيب كان أول شي يطلع نور من ذاك المكان من بعيد ويوم وصلو له كان ذاك المكان عالي وعلى جبل,وكأن الشمس شارقه عندهم, كان كله خضاااار وانهار وشلالات وعصافير من جميع الاشكال والالوان , والاشجار مزروعه بترتيب وكلها مثمره من جميع انواع الفواكه والخضار, والزهور والورود , نزلته قالت: وش رايك؟؟ منصور : ياسبحان الله وين انا ؟؟ البنت: هنا مسكني أنا أعيش هنا منصور: شي عجيب اكيد عايشه عيشة الهنا على كذا البنت: بالعكس كل ذا الخير ولاني متهنيه منصور :ليه؟؟ البنت: الوحده يامنصور الوحده شينه ماتنطاق لو معك الدنيا ومافيها منصور: خلاص يا.....على فكره وش اسمك ضحكت وقالت : توك تتذكر منصور: لا والله اني دايم متذكر ودايم على بالي السوال بس انش تروحين قبل لاأسالش البنت: اسمي خوله منصور: طيب يااحلى خوله,انسي الوحده وأنا بعيش معش هنا خوله: طيب وهلك وامك واخوانك يهنون عليك منصور: لاماعليش باخذهم معي عندش خوله وهي تضحك: انت خبل وخالص يامنصور منصور: ليه والله أقولش وانا من جدي خوله: شوف يامنصور بقولك الصدق وبقولك حقيقتي وقصتي, أنت مره سالتني مره أنا جنيه وقلت لك لا بس أنا أنا أنا أنا جنيه يامنصور بس خفت اقولك وتخاف مني عشان كذ ماقلت لك منصور: ........................ خوله: شفت حتى يوم قلت لك ماعاد عرفت تتكلم منصور: لا لا السالفه ماهي كذا بس عمري ماتوقعت احاكي جنيه في حياتي ولابعد جنيه حلوه خوله وهي تضحك:هذا ماهو شكلي يامنصور بس انا متشكله على شكل انسان عشان ماتخاف منصور: ليه كيف هو شكلش؟؟ خوله : انسى ذا الموضوع وخلنا بالمهم منصور: وش اهم منش ؟؟ خوله: أنت ,أنت يامنصور أبغى أساعدك قبل لاأهاجر منصور: تهاجرين انتي ؟؟؟وووووووين؟؟؟وليه؟؟؟ خوله :زي ماانت شايف انا جالسه هنا لحالي وبلحق هلي منصور:وين هلش خوله : هاجرو وعييت اروح معهم وراحوا وخلوني بس ذلحين كل شوي يرسلون لي حد عشان يقنعني اني الحقهم ويقولولن امي تعبانه تبى تشوفني,وانا قررت الحقهم بس بعد ماتطمن عليك منصور:لاتخافين علي انا بكون بخير خوله:لا أنا ماراح أروح إلا اذا شفت أبيك عقل واهتدى,وامك تترك شغل الخياطه اللي متعبها,ونوره تتزوج سلمان,وانت طبعا تكمل دراستك,وحمد يخرج من السجن منصور:كل ذا تبغينه يصير خوله: ماعلى الله قوي يامنصور بس توكل على الله وشوف وش بيصير بعدين يالله بسرعه غمض عيونك منصور: ليه شوي ماقد شبعت منش مشت خوله بسرعه صوب منصور وغمضت عيونه بيديها وحس منصور انه يطير عرف انها تبغى ترجعه وحس وقتها انها اخر مره يشوف فيها خوله .................... أم منصور: منصور قم ياولدي وش ذا النوم يالله رح شوف وش سوى اخيك قم طمني ياولدي منصور: ابشري يالله قايم صالح:منصور تعال فهد برى يدعيك بسرعه يوقول عنده اخبار حلوه منصور: هلافهد حياك ادخل فهد: قال ادخل قال يالله معي ابشرك حمد بيطلع اليوم منصور: كيف؟؟ وش صار؟؟ومن قال لك؟؟ فهد:انا خليت خالي يدخل بالموضوع وهو محامي شاطر وطلع حمد واصلا حمد ماله في ذي السوالف كلها واخوياه اعترفو انه ماله أي دخل بسرقاتهم كلها منصوروهويضم فهد من الفرحه: الله يبشرك الله يبشرك يافهد يالله جاي معك بس خلني ابشر امي واجي منصور وهو يجري لامه ويبشرها ويضمها والكل يصيح ويحمد ربي منصور:يالله ياصالح بروح اطلع حمد وخذ ذي الفلوس ورح شف البيت وش ناقصه وجبه, وانتي يانوير ياختي نبغى سفره محترمه ترى بعزم فهد وخاله لانهم يستاهلون على البشاره نوره : من عيوني والله ابشر بالخير انت وهم منصور: يالله يافهد اعذرني تاخرت عليك بس حبيت ابشر هلي ماعاد فكوني من التحقيق فهد:انت لايمهم راحو وطلعو حمدوهم مبسوطين ويسولفون ويضحكون لقوا ابيهم عند الباب حالته يرثى لها ثوبه وسخ وقده مطول ماحلق وحاط ايده على خده ودموعه تنزل حمد ومنصور وفهد يشبحون فيه باستغراب !!!!!!! منصور: وش فيك يابه حمد: سلامات يابه عسى ماشر فهد: ياعم وش صاير طمنا أبو منصور:منصور ياولدي تعال ابغاك بموضوع منصور: ابشر نفداك دخل منصور وابيه للبيت وقعدوا في حدى الغرف والكل مستغرب من ذا الهدوء في ابيهم واول مره يجلس ويكلم حد بذي الطريقه ابو منصور:شف ياولدي انا داري انكم شفتوا مني الظلم بعينه وعلمه,وعارف اني اذيتكم واحد واحد وقصرت معكم لاكان كادوري ابيكم ولامن المصاريف والواجبات,لكن شف اعاهدك بالله ومحمد رسول الله واله اني بتاعالج واعقل وادور لي وظيفه لكن كل ذا بعد ماغيب عنكم فتره ولاني بجايكم الاماقدني اب تفتخرون فيه منصور: وش ذا الحكى يابه مهما كان انت ابينا وعلى راسنا من فوق وبعدين وين تبى تروح وكيف بتسوي ابو منصور:شف يامنصو والله والله اني بعد كلامك ذا الليل اني شفت شي مايعلم فيه منصور: وش صار لك؟؟؟ ابو منصور: مدري مدري بس والله حسيت اني مريت جهنم وعذابها منصور يفكر يقول لنفسه معقول لخوله يد بالموضوع منصور: الحمد لله والهدايه اتمناها لك عشان نفسك واخرتك قبل ماتكون لنا ابو منصور:يالله انا رايح وخذ ذا الظرف فيه مصروف بيكفيكم لين ارجع ولاتخاف من ذي الفلوس والله والله انها حلال ,وترى ابو سلمان بيجيكم الاسبوع الجاي يخطب نوره لسلمان قد خطب اكثر من مره وعييت والحين جا مره ثانيه ووافقت واذا جاكم تممو كل شي لين اجي منصور: طيب ابشر وانتبه لنفسك وطمنا عليك طلع ابو منصور من الغرفه والكل كان مجتمع على حمد يسولفون معه شبح فيهم ابيهم واحد واحد ,كلهم بدو يخافون وتوقعون يسوي شي او يدبغ حد فيهم ,ابتسم لهم لهم كلهم وشبه في زوجته وقال:سامحيني يام منصور سامحيني يالغاليه,سامحوني ياعيالي دمعت عينه ومشي بسرعه يبى يروح إلابيوسف طامر على ارجيله ويحبها قاموا عياله كلهم بعد يوسف يضمون ابيهم ويبكون قال لهم والعبره خانقته: سامحوني ياعيالي بغيب عنكم فتره واعود ماني بمطول ابتسم لهم وراح .......................... بعد ثلااااااااااااااااااااااااااث سنوااااااااااااااااااااااااااااااااااااات فهد :يالله يامنصور ماصارت ماعاد الاذي السنه ووتخرج احلى يامهندس منصور: انشاء الله الله يسمع منك ويالله انا بروح نوره وزوجها سلمان بيجونا الليله وابي ملزم احضر فهد :أجل رح الله يستر عليك والملقى اخر الليل منصور: تم انشاء الله ..... الكل مجتمع بالمجلس ونوره ماسكه ولدها منصور,دخل منصور وهويقول :انا اقول وش ذا النور بالمجلس حقنا اثر سميي موجود هلاوغلا وشل منصور ولد نوره وقام يلاعبه ويحبب فيه ابو منصور:هاه ياولدي بشر كيف اخر اختبار؟؟ منصور: الحمد لله زين والنتايج الاسبوع الجاي ابو منصور: هاه بجيب لنا الاول بعد ذي السنه ام منصور: ايه بحول الله يجيبها ويجيب راسها هذا منصور وانا اعرفه منصور: وهويحب يد امه ابشري باذن الله مانزل عن الاول وان نزلت ماراح ابعد الثانيه وهو يغمز ويضحك سلمان:يالله شد حيلك وتخرج ترى وظيفتك قدهي جاهزه عندي بالشركه منصور: ماعليك كلها سنه وانا محضر عندكم سلمان : ماصدق لااله الاالله الكل يضحك منصور : طيب طيب سلمان : تعال تعال مابلا امزح انت داري حاجزك من زمان عندي بالشركه,والله يحيك وانت من ريحة الغالين منصور:اهااااااا عشان الغالين هاه ويغمز لنوره سلمان وهويحط ايده على كتف نوره: اجل عشان خشتك الشينه الكل يضحك وكانت ليله من أجمل الليالي تعشوا وسولفوا وضحكوا,وبعدها طلع منصور تذكر خوله جلس يطالع في البيت المهجور اللي ماعاده يجيه الانادراا وابتسم وغمض عيونه وجلس يتذكر كل شي معها ,حس وقتها بنسمه هوا بارده وريحه حلوه عرف انها قريبه منه قال: بصوت عااااااالي والله ماأنساش ياخوله... ......................................انتهت....... ......................... ربما ان كل انسان منا يحتاج ان يرسم له خيال كي يرتاح قليلا من عنا الواقع.. وربما البعض ينسى الواقع ويعيش بالخيال الى ان يصبح مجنونا. وربما فعلا هناك مثل خوله في عالمنا....... وربما لم يكن هناك فتاه تدعى خوله....وربما كانت موجوده.لكن ربما لم تكن من ساعد منصور ربما كانت مجرد خيال نسجه خيال منصور كي يجاري حياته الصعبه...ربما رسم له قلب حنون يحميه ويخاف عليه ويهتم به..ربما كانت فعلا جنيه..وربما كانت خيال...لكن الاهم أن خوله في حياة منصور ذكرى لاتنسى وسر سيحمله في قلبه الى ان يموت.. .................................................. ....................
     |
|
06-05-2009, 10:21 PM
| ||||
| ||||
 أرجو أن يحوز قلمي المتواضع على اجاب الجميع من مشرفين وأعضاء وزوار ...
|
|
09-09-2009, 03:24 PM
| ||||
| ||||
| مميزة القصة وجميلة
|
|
09-10-2009, 04:19 AM
| ||||
| ||||
| أشكركـ على تواجدكـ
|
|
| مواقع النشر (المفضلة) |
| الذين يشاهدون محتوى الموضوع الآن : 1 ( الأعضاء 0 والزوار 1) | |
| أدوات الموضوع | |
| انواع عرض الموضوع | |
العرض العادي
| |
03:41 AM
